نئی دہلی :
دہلی سرکار کے ڈائریکٹوریٹ آف ایجوکیشن کے ’پوسٹ فکسیشن سیل ( پی ایف سی ) کے آرڈر سے سرکاری اسکولوں میں برسوں سے بطور گیسٹ ٹیچر مختلف مضامین پڑھانے والے سیشن 2020-21کے 481 لیکچرار کی نوکری پر تلوارلٹک گئی ہے۔ ان تمام لیکچرار پر 2018-19کے پی ایف سی کے حکم کو نافذ کیا گیا ہے۔ اس آرڈر کے ساتھ 481 سرکاری اسکولوں کی لسٹ اٹیچ کی گئی ہے ، جن میں ہر ایک میں ایک لیکچرار کی پوسٹ ختم کی گئی ہے۔ سبھی مضامین کے علاوہ لیکچرار اردو کی 5 اسکولوں میں 5 پوسٹ کم کی گئی ہیں، جبکہ بچوں کی کوئی کمی نہیں ہے ۔ بتایا جا تا ہے کہ 11 ویں اور 12 ویں میں اردو پڑھنے والے بچوں کی تعداد میں کمی کے بجائے رواں سیشن میں اردو پڑھنے والوں بچوں کازیادہ انرول ہوا ہے جس سے لیکچرر اردو کی پوسٹ بڑھنی چاہئے۔
دہلی سرکار کے ڈائریکٹوریٹ آف ایجوکیشن کے پوسٹ فکسیشن سیل ( پی ایف سی ) کی سیکشن آفیسر سبینہ ورما کے ذریعہ 25 جون کو جاری آرڈر میں 2018-19کے حکم کو 2020-21کے سیشن کے لیے نافذ کردیا گیا۔ اس حکم کے مطابق 481لیکچرار کی پوسٹ کم ہوگئی یعنی 481 اسکولوں میں ہر ایک اسکول سے ایک لیکچرار کی پوسٹ کم کی گئی ہے۔ اس آرڈر کے ساتھ ان 481 اسکولوں کے نام کی لسٹ بھی اٹیچ کی گئی ہے۔ ان میں پانچ اردو کے لیکچرار کی پوسٹ بھی ختم ہوگئی ہیں۔ ان اسکولوں میں ایس کے وی نمبر یمنا وہار، جی جی ایس ایس نمبر 2 تک میر پور، ایس بی وی جعفر آباد، ایس کے وی زینت محل جعفر آباد اور جی جی ایس ایس ایس برہم پوری شامل ہیں۔
اس تعلق سے معروف آر ٹی آئی ایکٹوسٹ اور ظرف ایجوکیشن اینڈ ویلفیئر سوسائٹی کے چیئرمین منظر علی خان نے کہاکہ وہ اس سلسلے میں پی ایف سی برانچ ، ڈائریکٹوریٹ آف ایجوکیشن کو مکتوب لکھنے جا رہے ہیں کہ ان تمام پوسٹوں کو اسکولوں میں برقرار رکھا جائے۔ انہوں نے کہاکہ دہلی سرکار کو اس معاملے میں مداخلت کرنی چاہئے کیونکہ کورونا دور میں نوکری ختم ہوگئی ہے اور پہلے ہی بہت سارے لوگ بے روزگار ہو چکے ہیں ،جبکہ اب پرانی پی ایف سی 2018-19نافذ کر 481 لیکچرار کی پوسٹ ختم کرنے کی تیاری ہے جو پچھلے دس سے بارہ سالوں سے الگ الگ مضامین میں دہلی سرکار کے اسکولوں میں کام کررہے ہیں۔
بتایا جا تا ہے کہ پی ایف سی نے 25 جون کو یہ آرڈر نکالا ہے اور 26 جون سے ہی ان اسکولوں نے گیسٹ ٹیچر کے طور پر پڑھانے والے لیکچرار کو آنے سے منع کردیا ، حالانکہ دہلی سرکار نے سرکاری اور امداد یافتہ اسکولوں میں برسوں سے اپنی خدمات انجام دے رہے گیسٹ ٹیچروں (لیکچرار ) کی مدت میں جون کے دوسرے ہفتہ میں 22 ہزار گیسٹ ٹیچرووں کو سیشن 2021-22کے لیے متوقع دیا جس میں گزشتہ 19 اپریل سے 9 جون تک جن گیسٹ ٹیچروں کو موقع فراہم کیا گیا تھا، اس میں توسیع کی جاری ہے۔ اس آرڈر کے تحت ایسے سبھی گیسٹ ٹیچروں کو 10 جون سے اپنے اپنے اسکولوں میں جا کر رپورٹ کرنے کو کہا گیا اور ان ٹیچروں کو 17 جون تک رپورٹ کرنے کا موقع دیا گیا تھا۔