کولکاتا :
مغربی بنگال میں دوسرے مرحلے کی ووٹنگ کو لے کر نندی گرام کافی موضوع بحث بنی ہوئی ہے۔ اس سیٹ پر بنگال کی سی ایم ممتا بنرجی اور بی جے پی رہنما شوبھندو ادھیکاری کے مابین زبردست مقابلہ ہے۔ یہاں ہورہی ووٹنگ کو لے کرممتا بنرجی نے الیکشن کمیشن پر الزام لگایا کہ وہ شکایات پر کوئی کارروائی نہیں کررہی ہے۔
نندی گرام میں ممتا بنرجی نے کہا کہ ہم عدالت جائیں گے کیونکہ الیکشن کمیشن کارروائی نہیں کررہی ہے۔
دوسری طرف ممتا نے ایک پولنگ بوتھ سے گورنر جگدیپ دھنکھڑ کو فون کرکے شکایت کی ہے کہ وہ (بی جے پی) کے کارکنان مقامی لوگوں کو ووٹ نہیں ڈالنے دے رہے ہیں۔ میں صبح سے ہی انتخابی مہم چلا رہی ہوں۔ اب میں آپ سے اپیل کر رہی ہوں کہ اسے دیکھیں۔
بتادیں کسی بھی گڑبڑی کو لے کر ممتا اس بیچ نندی گرام میں ہی موجود ہیں اور پولنگ کا جائزہ لے رہی ہیں۔
وزیر اعلیٰ نے الیکشن کمیشن پر الزام لگایا کہ صبح سے ہی انتخابات سے متعلق 63 شکایات درج کرائی گئی ہیں ، لیکن الیکشن کمیشن نے کوئی کارروائی نہیں کی۔
ممتا بنرجی نے کہا کہ دوسری ریاستوں کے غنڈے یہاں ہنگامہ کررہے ہیں ، لیکن کوئی کارروائی نہیں کی جارہی ہے۔
بنگال کی وزیراعلیٰٰ نے کہا کہ یہاں جو لوگ نعرے بازی کررہے ہیں وہ باہر کے لوگ ہیں۔ وہ یوپی سے بہارسے آئے ہیں ، جنھیں سینٹرل سیکورٹی فورسز کے ذریعہ تحفظ فراہم کیا جارہا ہے۔