پٹنہ (ایجنسی) ملک سے تمام پارٹیاں ختم ہو جائیں گی، صرف بی جے پی باقی رہے گی۔ یہ دعویٰ پارٹی کے قومی صدر جے پی نڈا نےکیا ہے۔ انہوں نے کہا کہ اگر ہم اپنے نظریے پر چلتے رہے تو ملک سے علاقائی جماعتیں ختم ہو جائیں گی۔ نڈا بہار بی جے پی کے 16 ضلعی دفاتر کا افتتاح کرنے پٹنہ پہنچے تھے۔دینک بھاسکر کے مطابق انہوں نے بہار کے 7 اضلاع میں دفاتر کا سنگ بنیاد کے دوران یہ بات کہی ۔ نڈا نے کہا بھارتیہ جنتا پارٹی کے خلاف لڑنے کے لیے کوئی قومی پارٹی نہیں رہ گئی ہے۔ ہماری اصل لڑائی خاندان پرستی سے ہے۔ کارکنوں کی تعریف کرتے ہوئے کہا کہ کچھ نہیں ملا، کچھ نہیں ملے گا، تب بھی لوگ ہمارے ساتھ ہیں۔انہوں نے کہا، ‘لوگ کہتے ہیں کانگریس کی بات۔ میں کہتا ہوں کہ 40 سال بعد بھی وہ ہمارے برابر نہیں کھڑی ہو سکتی، ہم جس طرح کی پارٹی ہیں، وہ 2 دن میں نہیں آتی۔ یہ سنسکار سے آتا ہے اور سنسکار دفتر سے ہی آتے ہیں۔ ہماری پارٹی کا نظریہ اتنا مضبوط ہے کہ 20 سال دوسری پارٹیوں میں رہنے کے بعد لوگ ہماری پارٹی میں آ رہے ہیں۔نڈا نے کہا، ‘جب 2014 میں بھارتیہ جنتا پارٹی کی حکومت بنی اور نریندر مودی وزیر اعظم بنے تو وہ پارٹی میٹنگ میں شرکت کے لیے بی جے پی کے دفتر گئے تھے۔
وزیر اعظم نے ہر ضلع میں پارٹی دفتر کا تصور کیا۔ انہوں نے پارٹی کے عہدیداروں کو تلقین دی کہ ہم اتنی بڑی پارٹی بن گئے ہیں، کیا ہم اپنا دفتر نہیں رکھ سکتے؟ کیا ہر ریاست کے ہر ضلع میں اپنا دفتر نہیں ہونا چاہیے؟ اس وقت پارٹی کے قومی صدر امت شاہ اس مہم کو پورا کرنے میں لگ گئے۔ بی جے پی نے 750 اضلاع کی نشاندہی کی ہے اور آج 250 دفاتر تیار ہیں۔ 512 دفاتر میں کام جاری ہے۔