نئی دہلی :
دہلی یونیورسٹی کے تعلیمی سیشن 2021-22میں پوسٹ گریجویٹ ( پی جی ) ایم فل ، پی ایچ ڈی کورسز میں داخلے کے لیے آن لائن رجسٹریشن کی ریس پیر شام پانچ بجے سے شروع ہوگئی ہے۔ داخلے کے لیے پیر کو داخلہ پورٹل لانچ کر دیا گیا۔ رجسٹریشن کا عمل شروع ہونے کے آدھے گھنٹے کے اندر ہی ملک و بیرون ملک سے تقریباً 4,727ہٹ ہوئے۔
داخلہ پورٹل( https://admission.uod.ac.in/ ) کے ذریعہ مختلف کورسز کے لئے درخواستیں دی جاسکتی ہیں۔ ان کورسز میں درخواست 21 اگست تک کی جاسکتی ہے ۔ گزشتہ سال کی طرح اس بار بھی داخلہ عمل پوری طرح آن لائن ہے ۔ داخلے سے متعلق جانکاری پورٹل پر جاری کئے گئے انفارمیشن بلیٹن سے حاصل کی جاسکتی ہیں ۔
ڈی یو انتظامیہ نے رجسٹریشن کرنے سے قبل انفارمیشن بلیٹن کو غور سے پڑھنے کا مشورہ دیا ہے۔ داخلہ پر مبنی کورسز کے لئے ، جنرل او بی سی زمرے میں750 روپے کی ادائیگی کرکے درخواست دے سکتے ہیں، جبکہ ایس سی ؍ ایس ٹی و پی ڈبلیو ڈی درخواست دہندگان کو درخواست فیس کے طور پر 300 روپے ادا کرنا ہوگا ۔
ڈی یو داخلہ ڈین پروفیسر راجیو گپتا نے بتایا کہ پی جی کے 133 کورسز و ایم فل – پی ایچ ڈی کے لئے درخواست عمل کی شروعات شام پانچ بجے ہو گئی ۔ محض آدھے گھنٹے کے اندر ہی 4,727ہٹ موصول ہوئے۔
ان میں سےموبائل سے 75.6فیصد نے پورٹل پر ہٹ کیا۔ 23.6فیصد نے کمپیوٹر کے ذریعہ سے اور 0.8نے ٹیبلٹ کے ذریعہ سے ہٹ کیا۔ سب سے زیادہ ہٹ دہلی- این آر سی ، گوہاٹی ، ممبئی ،شیلانگ و منی پور سے موصول ہوئے۔ اتنے کم وقت میں پورٹل پر 8,700لاگ ان کئے گئے۔ جبکہ 14,903نے رجسٹریشن پیج کو دیکھا۔ شام ہوتے ہوتے کافی درخواست گزاروںنے پورٹل پر اپ لوڈ بھی کرنا شروع کردیا۔
نیشنل ٹیسٹنگ ایجنسی کی جانب سے کورسز میں داخلے کے لیے دہلی یونیورسٹی انٹرس ٹیسٹ ( ڈی یو ای ٹی ) کاانعقاد کیاجائے گا۔ ہر پروگرام میں داخلے کے لیے طلبہ کو الگ سے درخواست کرناہوگی ۔ داخلے میں درخواست گزاروں کو کسی طرح کی دشواری نہ ہو اس کے لیے محکموں کے مطابق نوڈل آفیسر کی فہرست بھی جاری کی گئی ہے۔ ڈی یو انتظامیہ نے واضح کیا ہے کہ داخلہ فہرست بعد میں جاری کی جائے گی ۔