کرناٹک کے بیدر میں واقع شاہین اسکول کے خلاف بغاوت کے مقدمے کو کرناٹک ہائی کورٹ نے بدھ (14 جولائی) کو خارج کر دیا۔ ریاست کی اس وقت کی بی جے پی حکومت نے جنوری 2020 میں مقدمہ درج کیا تھا۔
لائیو لاء( live law) کے مطابق جسٹس ہیمنت چندنگودر کی بنچ نے علاؤالدین اور دیگر کی درخواستوں کو منظور کرتے ہوئے یہ فیصلہ کیا ہے۔ دراصل، یہ الزام لگایا گیا تھا کہ 2020 میں، CAA ایکٹ کے خلاف کلاس 4 کے طلباء کے اسٹیج پر پیش کیا گیا ڈرامہ فرقہ وارانہ نوعیت کا تھا۔ یہ دعویٰ کیا گیا کہ اسٹیج پر وزیر اعظم نریندر مودی کے خلاف نعرے لگائے گئے۔ اس کے تعلق سے نیلیش راکیشالا نے بیدر پولیس اسٹیشن میں آئی پی سی کی دفعہ 504، 505 (2)، 124 (A) اور 153 (A) کے تحت مقدمہ درج کیا تھا۔
2020 میں، بچوں نے CAA اور NRC کے حوالے سے ایک ڈرامہ پیش کیاتھا۔ اس کے بعد کہا گیا کہ اسکول ملک کے خلاف کام کر کے منفی باتیں پھیلا رہا ہے۔ اس دعوے کو مسترد کرتے ہوئے شاہین گروپ آف انسٹی ٹیوشن نے کہا تھا کہ پولیس روزانہ اسکول آتی تھی اور بچوں کے ساتھ غداروں جیسا سلوک کرتی تھی۔