دیوبند،(سمیر چودھری)
ہریانہ کے پانی پت کے کمشنر اور یوپی الیکشن میں سہارنپور کی نکوڑ سیٹ پر الیکشن آبزرور آئی اے ایس رام کمار اور آندھرا پردیش کے وجئے واڑہ کے ایڈ منسٹریٹرو گنگوہ سیٹ کے الیکشن آبزرور آئی اے ایس ایم نائک نے آج ممتازدینی درسگاہ دارالعلوم دیوبند پہنچ کرمہتمم مفتی ابوالقاسم نعمانی سے ملاقات کی۔اس دوران دونوں افسران نے ادارہ کے متعلق تفصیلی معلومات حاصل کی۔انہوںنے فتویٰ ، ادارہ کے نظام تعلیم اور انتظامی امور کے متعلق بھی معلومات حاصل کی اور کہاکہ بڑے عرصہ یہاں حاضری کی خواہش تھی،آج یہاں پہنچ کر بہت خوشی اور روحانی مسرت حاصل ہوئی ہے۔
ایم نائک نے بتایا کہ انہوں نے اپنی اسٹڈی کے دوران اس ادارہ کے بارے میں پڑھا تھا۔اس سے قبل مہتمم مفتی ابوالقاسم نعمانی نے دونوں مہمانوں کا خیر مقدم کیا اور دارالعلوم دیوبند کی تاریخی کے سلسلہ میںتفصیلی معلومات ، یہاں دی جانے والی تعلیمات اور اس ادارہ کے قیام کے مقاصد پر روشنی ڈالی ۔دونوں افسران نے ادارہ کی تاریخ خدمات کی بھرپور ستائش کی۔ بعد ازیں دونوں افسران نے ادارہ کی لائبری پہنچ کر وہاں رکھی نادر و نایاب کتابیں دیکھی اور نہایت مسرت و حیرت کااظہار کرتے ہوئے اسے عظیم علمی ذخیرہ قرار دیا۔ اس دوران انہوں نے مسجد رشید، جدید لائبریری سمیت ادارہ کے تاریخی عمارات کا بھی معائنہ کیا۔
بعد ازیں الیکشن افسران نے دیوبند کے سرکاری گیسٹ ہاؤس میں پہنچ کر یہاں الیکشن افسران کی میٹنگ لیتے ہوئے انہیں الیکشن کے متعلق ضروری ہدایات کیں ۔