دیوبند:
آل انڈیا مسلم پرسنل لاء بورڈ کی اصلاح معاشرہ کمیٹی کی جانب سے 27 مارچ سے 7 اپریل تک ’سادہ و مسنون نکاح ملک گیر مہم‘‘کو اتر پردیش میں کامیاب بنانے کے لئے اصلاح معاشرہ کمیٹی اترپردیش کے اراکین سرگرم عمل ہیں۔اس سلسلہ سے اصلاح معاشرہ کمیٹی آل انڈیا مسلم پرسنل لاء بورڈ اترپردیش کے تحت دیوبند کے محلہ لہسواڑہ دیوبند کی جامع مسجد میں گزشتہ شب اصلاح معاشرہ کا جلسہ منعقد ہوا۔جلسہ سے خطاب کرتے ہوئے دارالعلوم وقف دیوبند کے استاذ حدیث مولانا فرید الدین قاسمی نے کہا کہ جہیز کی لعنت سے سماج کو پاک کرنا ہر مسلمان کا فریضہ ہے اور نکاح کو سادہ و مسنون طریقے پر انجام دینے کے لیے تقریب نکاح کا سلسلہ ختم کرکے مسجد میں نکاح کو فروغ دینا ہوگا۔انہوں نے قرآن و سنت کی روشنی میں اسلام کے نظام نکاح پر تفصیلی روشنی ڈالی اور آل انڈیا مسلم پرسنل لاء بورڈ کی اس مہم سے ہر فرد کو جڑنے کی تلقین کی۔
مولانا عباد اللہ عمیس قاسمی استاذ حدیث جامعۃ الشیخ حسین احمد المدنی نے کہا کہ خوشگوار ازدواجی زندگی کے لئے نوجوان لڑکوں اور لڑکیوں کو طے کرنا ہوگا کہ وہ ڈی جے، باجہ،ناچ گانا،ہلدی،منڈھا جیسی رسوم و رواج اور فحاشی سے کلی اجتناب کرتے ہوئے اسوہ رسول اکرم صلی اللہ علیہ و سلم کے مطابق نکاح کریں گے اور ولیمہ میں فضول خرچی سے بچیں گے نیز اپنے بچوں کی تعلیم و تربیت پر پوری توجہ صرف کریں گے۔
اس موقع پر اصلاح معاشرہ کمیٹی آل انڈیا مسلم پرسنل لاء بورڈ کی جانب سے جاری اقرار نامہ کو پڑھ کر سبھی سامعین سے تمام نکات پر اقرار بھی کرایا گیا اور کثیر تعداد میں اقرارنامے کی کاپیاں تقسیم بھی کی گئیں۔اس موقع پر پروگرام کے منتظم عبدالواحد قریشی نے اس مہم کو گھر گھر پہنچانے کا عہد کیااور سبھی کا شکریہ ادا کیا۔ادھر بعد نماز عشاء دوسری نشست آن لائن منعقد ہوئی جس میں ڈاکٹر مفتی اسجد قاسمی ندوی مہتمم و شیخ الحدیث جامعہ امدادیہ مرادآباد،مولانا عباد اللہ عمیس قاسمی ، معروف خطیب مولانا انوار الحق قاسمی استاذ حدیث دارالمبلغین لکھنؤ اورمولانا عبداللہ آزاد مظاہری نائب شہر قاضی کانپور نےکہا کہ آل انڈیا مسلم پرسنل لاء بورڈ کی یہ مہم وقت کی پکار اور ملت کی ضرورت ہے۔پروگرام کے کنوینر مہدی حسن عینی قاسمی نے اخیر میں مہمانوں کا شکریہ ادا کرتے ہوئے اترپردیش کے علماء و ائمہ،سماجی کارکنان اور دانشوروں سے اپیل کی ہے کہ وہ اس مہم کو اتر پردیش میں کامیاب بنانے کے لیے اپنا کردار ادا کریں۔