ممبئی :(ایجنسی)
مہاراشٹر میں فلور ٹیسٹ سے پہلے ہی ادھو ٹھاکرے کے وزیر اعلیٰ کے عہدے سے استعفیٰ دینے کے بعد بی جے پی نے حکومت بنانے کا کام شروع کر دیا ہے۔ مہاراشٹر بی جے پی کے صدر چندرکانت دادا پاٹل نے کہا ہے کہ سابق وزیر اعلیٰ دیویندر فڈنویس اور ایکناتھ شندے جنہوں نے شیو سینا میں بغاوت کی قیادت کی تھی، اگلا لائحہ عمل طے کریں گے۔ مہاراشٹر بی جے پی کی کور کمیٹی کی میٹنگ آج (جمعرات )کو ہی بلائی گئی ہے۔
سپریم کورٹ کے ذریعہ فلور ٹیسٹ پر روک لگائے جانے کی شیوسینا کی مانگ سے انکار کرنے کے بعد سبکدوش وزیر اعلیٰ ادھوٹھاکرے سامنے آئے اور انہوں نے استعفیٰ دینے کااعلان کیا۔ اس کے بعد وہ گورنر بھگت سنگھ کوشیاری کے پہنچے اور انہیں اپنا استعفیٰ سونپا۔
راج بھون کی جانب سے ادھو ٹھاکرے سے کہا گیا ہے کہ وہ نئی حکومت بننے تک اس عہدے پر کام کرتے رہیں۔ چیف منسٹر کے عہدے سے استعفیٰ دینے کے ساتھ ہی ادھو ٹھاکرے نے قانون ساز کونسل سے بھی استعفیٰ دے دیا۔
مانا جا رہا ہے کہ دیویندر فڈنویس ایک بار پھر وزیر اعلیٰ کا عہدہ سنبھالیں گے اور وہ 2 سے 3 دن کے اندر حلف اٹھا سکتے ہیں۔ ایکناتھ شندے اور ان کی حکومت میں دیگر باغی ایم ایل اے کا رول کیا ہوگا اس کے بارے میں تیزی سے ایک بلیو پرنٹ تیار کیا جا رہا ہے۔ کچھ دن پہلے فڈنویس دہلی آئے اور بی جے پی صدر جے پی نڈا اور مرکزی وزیر داخلہ امت شاہ سے ملاقات کی تھی۔
اس کے بعد انہوں نے گورنر سے ملاقات کی اور پھر گورنر نے ادھو ٹھاکرے حکومت سے اکثریت ثابت کرنے کو کہا جس کے بعد شیوسینا سپریم کورٹ گئی اور سپریم کورٹ نے فلور ٹیسٹ پر روک لگانے سے انکار کر دیا۔ مجموعی طور پر 2 سے 3 دن کے اندر تیزی سے حالات بدل گئے اور اب دیکھنا یہ ہے کہ نئی حکومت کی تشکیل میں شیوسینا سے بغاوت کرنے والے ایم ایل اے کو کیا ذمہ داری ملتی ہے۔
دوسری طرف شیو سینا کے باغی ایم ایل اے کب ممبئی پہنچیں گے اس کو لے کر ہر طرح کی قیاس آرائیاں کی جا رہی ہیں۔ مہاراشٹر بی جے پی کے صدر چندرکانت دادا پاٹل نے باغی ایم ایل اے سے جمعرات کو ممبئی نہ آنے کی اپیل کی ہے۔ پاٹل نے کہا کہ انہیں حلف کے دن ہی یہاں آنا چاہئے۔
آپ کو بتا دیں کہ کچھ دن پہلے شیوسینا کے خلاف بغاوت کرنے والے ایم ایل اے کے گھروں اور دفاتر پر حملے ہوئے تھے۔
سونیا، پوار کا شکریہ
بدھ کی رات، ادھو ٹھاکرے نے فیس بک لائیو کے ذریعے مہاراشٹر کے لوگوں سے خطاب کیا۔ اس میں انہوں نے کہا، ‘آج کی کابینہ کی میٹنگ ہوئی کہ جس اورنگ آباد شہر کا نام سمبھاج نگر کرنے کا خواب بالا صاحب ٹھاکرے کا تھا آج اس کو مہاراشٹر کی سرکار نے پورا کیا ہے۔ گزشتہ ڈھائی سال میں میری سرکار نے بہت کام کیا ہے ۔ آج میں خاص طور پر این سی پی سربراہ شرد پوار اور سونیا گاندھی جی کا شکریہ ادا کرتاہوں ۔