پریاگ راج: سوشل میڈیا پر صبح سے ایک خبر تیزی سے گردش کررہی ہے ۔خبر کے مطابق اترپردیش کے پریاگ راج میں ایک مریض کے ساتھ خوفناک لاپرواہی کا معاملہ سامنے آیا ہے۔ وہاں کے ایک پرائیوٹ اسپتال میں مبینہ طور پر ڈینگی کے مریض کو پلیٹ لیٹس والے خون کے بجائے موسمی کا جوس چڑھادیا گیا۔ مریض کے لواحقین کا الزام ہے کہ جوس چڑھانے سے مریض کی موت ہوگئی۔ ضلع انتظامیہ کی جانب سے واقعے کی ابتدائی تحقیقات کے بعد اسپتال کو سیل کردیا گیا ہے۔ بتایا گیا ہے کہ عہدیداروں نے اس معاملے میں کوتاہی کی بات کو تسلیم کیا ہے۔
اس معاملے میں سوشل میڈیا پر ویڈیو وائرل ہوئی ہے جس میں ایک شخص الزام لگا رہا ہے کہ ڈینگی کے مریض کو پلازمہ کے بجائے سیزنل جوس چڑھا دیاگیا۔
ایک رپورٹ کے مطابق پریاگ راج کے گلوبل ہسپتال و ٹراما سینٹر میں ایک 32 سالہ مریض کے رشتہ داروں کو مبینہ طور پر ‘پلازما’ لکھے بیگ میں موسمی کا جوس فراہم کیا گیا تھا۔ این ڈی ٹی وی نے رپورٹ کیا کہ مریض کے اہل خانہ نے الزام لگایا ہے کہ ہسپتال کی طرف سے فراہم کردہ ایک تھیلے سے ‘خون’ چڑھانے کے بعد اس کی حالت مزید خراب ہو گئی۔ مریض کو دوسرے نجی اسپتال منتقل کیا گیا جہاں وہ دم توڑ گیا۔ ان کے اہل خانہ نے کہا، "اس دوسرے اسپتال کے ڈاکٹروں نے انہیں بتایا کہ ‘پلیٹ لیٹس’ بیگ جعلی تھا اور درحقیقت کیمیکلز اور جوس جیسے مصالحوں کا مرکب تھا۔”