پٹنہ :
بہار کانگریس نے الزام لگایا کہ جنتا دل یونائیٹڈ (جے ڈی یو) کے رہنما نتیش کمار وزیر اعلیٰ کی کرسی بچانے کے لئے بھارتیہ جنتا پارٹی (بی جے پی) لیڈروں کے خلاف بولنے سے خوفزدہ ہیں۔
بہار پردیش کانگریس میڈیا کمیٹی کے صدر راجیش راٹھور نے گزشتہ روز کہا کہ اترپردیش کی بی جے پی حکومت نے حالیہ دنوں میں ایسے بہت سے فیصلے لئے ہیں جو بہار اور بہار کے عوام کے مفادات کے خلاف ہیں ، اس کے باوجود اس کے وزیر اعلیٰ نتیش کمار خاموش ہیں۔ انہوں نے کہا کہ اترپردیش کی حکومت چھاڑن ندی میں ایک پائلٹ چینل تعمیر کررہی ہے جس کے خلاف بہار بی جے پی کے ممبر اسمبلی ونئے بہاری نے استعفیٰ تک دینے کی دھمکی دی ہے۔
مسٹر راٹھور نے کہا کہ بہار کے لوگوں کے جسد خاکی کا بنارس میں آخری رسومات کئے جانے کی بہت قدیم روایت رہی ہے ،جس پر فی الحال اترپردیش کی سرکار نے روک لگا دی ہے۔ وہیں دوسری جانب گنگا ندی میں اترپردیش کی سرحدی علاقوں سے لاشوں کو بہایا جار ہا ہے جس سے بہار میں ندی سے نکالی گئی ہے ۔انہوں نے کہاکہ ان تمام مسئلے پر وزیر اعلیٰ نتیش کمار خاموش ہیں جس سے لگتاہے کہ وہ اترپردیش کے وزیر اعلیٰ یوگی آدتیہ ناتھ سے ڈر ہوئے ہیں۔
کانگریس لیڈر نے کہا کہ سارن میں بی جے پی کے رکن پارلیمنٹ کی رہائش گاہ سے ایمبولینس برآمد ہونے معاملے میں ایف آئی آر درج کرانے کی ہمت تک نتیش کمار نے نہیں دکھائی ہے۔ انہوں نے کہاکہ ایسا لگتا ہے کہ بی جے پی اور بی جے پی لیڈروں سے خوفزدہ نتیش کمار نے وزیر اعلیٰ کی اپنی کرسی بچانے کے لیے ان کے سامنے ہتھیار ڈال چکے ہیں۔
مسٹر راٹھور نے کہا کہ بہار کے مفاد میں وزیر اعلیٰ نتیش کمار کو چھاڑن ندی پر تعمیراتی کام پر روک لگانی چاہئے اور بنارس میں بہار کے لوگوں کے آخری رسومات کے حق کے بارے میں اترپردیش سرکار سے بات کرنی چاہئے۔ انہوں نے کہاکہ نتیش کمار نے اگر ایسا نہیں کیا تو بہار کے عوام انہیں کبھی معاف نہیں کریں گے۔