لکھیم پور کھیری(ایجنسی)
یوپی کے لکھیم پور کھیری میں اتوار 3 اکتوبر کو ہوئے تشدد کےبعد سیاسی گھمسان مچ ہواہے۔ کانگریس، عام آدمی پارٹی ،ایس پی سمیت تقریباً تمام اپوزیشن پارٹی کے لیڈر مرکزی وزیر برائے مملکت اجےمشرا اور ان کے بیٹے آشیش و یوپی سرکار پر نشانہ سادھ رہے ہیں۔ اس درمیان کانگریس نے پیر کو ایک ویڈیو ٹوئٹر پر شیئر کرتے ہوئے لکھیم پور کھیری کےسانحہ کا بتایا ہے ، کانگریس کے علاوہ، عام آدمی پارٹی کے رکن پارلیمنٹ سنجے سنگھ اور کئی دیگر لیڈروں نے بھی ویڈیو شیئر کرتے ہوئے نشانہ سادھاہے ۔
سوشل میڈیا پر تیزی سے شیئر کئے جارہے ویڈیو میں دیکھا جا سکتا ہے کہ ایک گاڑی کچھ لوگوں کو روندتے ہوئے نکل جاتی ہے۔ کانگریس سمیت اپوزیشن پارٹیوں کے لیڈروں کا دعویٰ ہے کہ یہ ویڈیو لکھیم پورکے سانحہ کا ہے ، جس میں مرکز وزیر اجے مشرا کے بیٹے آشیش پر گاڑی کو کسانوں پر چڑھانے کا الزام پہلے سے ہی لگ رہا ہے ۔ اسی سلسلے میں آشیش کے خلاف تکونیہ تھانہ میں ایف آئی آر بھی درج کروائی گئی ہے ۔
آن لائن پورٹل آج تک ہندی کی رپورٹ کے مطابق کانگریس نے اس ویڈیو کو اپنے آفیشیل ٹوئٹر ہینڈل پر پوسٹ کیا اور لکھا ، ’’ لکھیم پور کھیری سے انتہائی پریشان کن منظر۔ ‘‘ حالانکہ ویڈیو میں یہ واضح طور پر نہیں دکھائی دیا کہ گاڑی کون چلا رہا تھا ، لیکن گاڑی ایک پگڑی پہنے شخص کے اوپر چڑھتے ہوئے دکھائی دی۔ اس کے بعد گاڑی نے کئی اور لوگوں کو بھی ٹکر ماری۔ جائے وقوع پر بڑی تعداد میں لوگ موجود تھے ۔ ٹوئٹر پر یہ ویڈیو اپوزیشن پارٹیوں سمیت کئی لوگ تیزی سے شیئر کررہے ہیں،حالانکہ ’روز نامہ خبریں‘ اس ویڈیو کی تصدیق نہیں کرتا ہے ۔
عام آدمی پارٹی کے راجیہ سبھا رکن پارلیمنٹ سنجے سنگھ نے بھی ویڈیو شیئر کرتے ہوئے حکومت کو نشانہ بنایا ہے۔ سنجے سنگھ نے لکھا کہ اس کے بعد بھی کچھ ثبوت درکار ہیں؟ دیکھو اقتدار کے گھمنڈ میں غنڈوں نے ان کو اپنی گاڑی کے نیچے روند کر موت کے گھاٹ اتار دیا۔ دوسری جانب یوتھ کانگریس کے صدر سرینواس نے بھی ویڈیو شیئر کی ہے۔ انہوں نے لکھا کہ یہ ریاست کے زیر اہتمام لکھیم پور قتل عام کا انتہائی دل دہلا دینے والا ثبوت ہے۔ اب تک کی سب سے افسوسناک ویڈیو۔
واضح رہے کہ اتوارکی سہ پہر لکھیم پور کھیری میں تشدد میں چار کسانوں سمیت آٹھ لوگوں کی جان چلی گئی۔ مرکزی وزیر اجے مشرا کے بیٹے آشیش کی گاڑی کو کسانوں پر چڑھائے جانے کا الزام لگا ہے ۔ اپوزیشن پارٹیوں کے لیڈروں نے لکھیم پور کھیری پہنچنے کی کوشش کی، لیکن کامیاب نہیں ہوسکے۔ کانگریس جنرل سکریٹری پرینکا گاندھی واڈارا کو سیتا پور میں گرفتار کرلیا گیا ۔ اس کےعلاوہ ایس پی قومی صدر اکھلیش یادو، بی ایس پی لیڈر ستیش چندر مشرا سمیت دگیر لیڈروں کو بھی لکھیم پور کھیری نہیں جانے دیا گیا۔ معاملے میں کسانوں نے مرکزی وزیر کے بیٹے آشیش مشرا کے خلاف ایف آئی آر درج کرائی ہے ۔
جبکہ دوسری جانب حکومت نے کسانوں کے متاثرہ اہل خانہ کے لیے معاوضے کا اعلان کیا ہے۔ کسان کی جانب سے انتظامیہ کی رضامندی کے بعد لاشوں کی بھی آخری رسومات ادا کردی گئی ہیں۔