نئی دہلی:(ایجنسی)
مذہبی تہوار آپسی بھائی چارے، پیارو محبت اور یگانگت کو پروان چڑھانے کا موقع فراہم کرتے ہیں مگر شر پسند عناصر ان تہواروں کو اپنے سیاسی مفاد اور نفرت کے کاروبار کو بڑھانے کے لئے استعمال کرنے لگے ہیں۔ابھی رمضان المبارک کا مہینہ چل رہا ہے۔ اس ماہ میں شب قدر اور آخری جمعہ کے موقع پر مسجدوں میں بڑی تعداد میں لوگ جمع ہوتے ہیں اور کچھ دن کے بعد عید الفطر آنے والی ہے۔ان تمام صورت حال کو یکھتے ہوئے مسلمانوں کے تمام مسالک و مکاتب فکر کی موقر ملی تنظیموں کے سربراہان اور اہم دینی و ملی شخصیات نے ملت اسلامہ ہند سے مشترکہ اپیل کی ہے کہ وہ رمضان کے اہم موقعوں اور عیدالفطر کے موقعے پر درج ذیل باتوں کا خصوصی طو ر پر خیال رکھیں:
اپنی بستیوں اور محلوں میں امن کمیٹیوں کے ساتھ اور برادران وطن کے ساتھ میٹنگیں کرکے اس بات کو یقینی بنائیں کہ کسی بھی شرپسند عناصر کو شر پھیلانے کا کوئی موقع نہ ملے، اگر کوئی ایسا کرتاہے تو سب مل کر اس کے خلاف انتظامیہ سے شکایت کریں ۔
مقامی انتظامیہ کے ساتھ بھی ایک نشست کریں اور اس میں اس بات کا تیقن حاصل کرنے کی کوشش کریں کہ کسی بھی صورت میں لاء اینڈ آرڈر کو متاثر نہیں ہونے دیں گے۔ ریاستی، ضلعی اور مقامی سطح پر دیگر مذاہب کی نمائندہ شخصیات سے ملاقات کریں، ان سے بھی اپیل جاری کروائی جائے کہ کسی بھی سیاسی جماعت یا کسی شرپسند گروہ کے دباؤ میں آکر لوگ ایسا کام نہ کریں جو ملک کی فضا کو مکدر کرنے والا ہو۔
کوشش کریں کہ برادران وطن کی اہم شخصیات اور حق پسند صحافی وغیرہ عید گاہوں کے باہر موجود رہیں، جہاں ممکن ہو وہاں سی سی ٹی وی کیمروں کا بھی انتظام کیا جائے،تمام مسلمان عید گاہ جاتے اور واپس آتے ہوئے پُرامن رہیں اور اگر ان کو مشتعل کرنے کی کوشش کی جائے تو اس کا شکار نہ ہوں۔ خطبہ عید میں بہت محتاط اور صاف زبان کا استعمال کریں، تاکہ آپ کی کسی بات کو بگاڑ کر پیش نہ کیا جاسکے ۔ تمام ہی عید گاہ کمیٹیوں اور مساجد کمیٹیوں سے گزارش ہے کہ مذکورہ بالا گزارشات پر عمل آوری کو یقینی بنانے کی کوشش کریں۔
اپیل کنندگان: مولانا محمد رابع حسنی ندوی،صدر آل انڈیا مسلم پرسنل لاء بورڈ،مولانا سید ارشد مدنی، صدر جمعیۃ علماء ہند،سید سعادت اللہ حسینی، امیر جماعت اسلامی ہند،مولانا سید محمود اسعد مدنی، صدر جمعیۃ علماء ہند، مولانا سید جلال الدین عمری،صدر شریعہ کونسل، مولانا خالد سیف اللہ رحمانی، جنرل سکریٹری آل انڈیا مسلم پرسنل لاء بورڈ، مولانا اصغر علی امام مہدی سلفی، امیر مرکزی جمعیت اہل حدیث ہند، نوید حامد، صدر آل انڈیا مسلم مجلس مشاورت، ڈاکٹر سید علی محمد نقوی، نائب صدر آل انڈیا مسلم پرسنل لاء بورڈ،ڈاکٹر ظفر الاسلام خاں، سابق صدر آل انڈیا مسلم مجلس مشاورت، مولانا محمد سفیان قاسمی، مہتمم دارالعلوم دیوبند، وقف، مولانا یٰسین اختر مصباحی، رضا اکیڈمی، مولانا محسن تقوی، امام و خطیب شیعہ جامع مسجد کشمیری گیٹ،مولانا جلال حیدر نقوی، کنوینر ترجمان، آل انڈیا شیعہ کونسل، ڈاکٹر منظور عالم، جنرل سکریٹری آل انڈیا ملی کونسل، ڈاکٹر سید قاسم رسول الیاس، رکن عاملہ آل انڈیا مسلم پرسنل لاء بورڈ۔