لکھنؤ :(ایجنسی)
سماج وادی پارٹی (ایس پی) کے سرپرست ملائم سنگھ یادو کے ساڑھو اور اوریا ضلع کے بیدھونا حلقہ کے ایم ایل اے پرمود کمار گپتا ایل ایس نے بی جے پی میں شامل ہونے کا اعلان کرتے ہوئے سنسنی خیز الزامات لگائے ہیں۔ انہوں نے کہا ہے کہ ایس پی کے سرپرست ملائم سنگھ یادو کو ان کے گھر میں قید رکھا گیا ہے۔ گپتا نے یہ بھی کہا کہ اب نیتا جی اور شیو پال سنگھ یادو کی پارٹی میں کوئی عزت باقی نہیں رہی، اس لیے وہ بی جے پی میں شامل ہونے جا رہے ہیں۔
سابق ایم ایل اے اور اکھلیش یادو کے موسا نے الزام لگایا کہ ایس پی میں ملائم سنگھ یادو اور شیو پال سنگھ یادو کو ہراساں کیا جا رہا ہے۔ ملائم سنگھ یادو کو وکرمادتیہ مارگ پر واقع ان کی رہائش گاہ پر یرغمال بنایا گیا ہے اور انہیں کسی سے ملنے کی بھی اجازت نہیں ہے۔ نیتا جی کے یوم پیدائش پر انہیں بولنے نہیں دیا گیا اور مائیک چھین لیا گیا۔
انہوں نے الزام لگایا کہ آج پارٹی میں غیر سماج وادیوں کو ترجیح دی جا رہی ہے اور پرانے سماج وادیوں کو نظر انداز کیا جا رہا ہے۔ ایس پی میں ایسے لوگوں کو شامل کیا جا رہا ہے جو اب تک ایس پی اور نیتا جی کو گالی دیتے تھے۔ انہوں نے کہا کہ جس پارٹی میں نیتا جی کی توہین ہونے لگی ہے اس میں رہنے کا کوئی فائدہ نہیں ہے، اس لیے اب وہ بی جے پی میں شامل ہو رہے ہیں۔