ممبئی: (ایجنسی)
این آئی اے مہاراشٹر کے امراوتی میں 21 جون کو ایک کیمسٹ کا گلا کاٹ کر قتل کے معاملے کی تحقیقات کرے گی۔ وزیر داخلہ امت شاہ نے اس سلسلے میں حکم جاری کردیا ہے۔ دراصل، مقامی بی جے پی نے الزام لگایا ہے کہ یہ قتل پارٹی کی معطل ترجمان نوپور شرما کے بیان سے جڑا ہوا ہے، کیونکہ متوفی امیش کولہے نے سوشل میڈیا گروپ میں نوپور شرما کی حمایت میں پوسٹ کیا تھا۔ اس معاملے میں اب تک چھ لوگوں کو گرفتار کیا جا چکا ہے۔ لیکن پولیس قتل کی واضح وجہ بتانے سے قاصر ہے۔
امیش کولہے پیشے سے کیمسٹ تھے۔ اس کی جانوروں کی دوا کی دکان ہے۔ 21 جون کی رات وہ دکان بند کرکے گھر واپس آرہے تھے۔ پھر راستے میں کچھ لوگوں نے اس کا گلا ریت کر قتل کر دیا۔ شروع شروع میں اسے ڈکیتی یا آپسی دشمنی میں قتل کا معاملہ لگا،لیکن ابھی تک تحقیقات میں ایسا کوئی ثبوت نہیں ملا۔ تاہم پولیس اس معاملے میں چھ لوگوں کو گرفتار کرنے کے بعد تفتیش کر رہی ہے۔ گرفتار ملزمان میں مدثر احمد، شارخ پٹھان، عبدالتوفیق، شعیب خان، عاطف راشد اور یوسف خان شامل ہیں۔
ادھر امراوتی پولیس پورے معاملے میں خاموشی اختیار کیے ہوئے ہے، اس لیے شک مزید گہرا ہوتا جا رہا ہے۔ اس دوران بی جے پی نے معاملے کی جانچ این آئی اے کو دینے کا مطالبہ کیا تھا۔ اہم بات یہ ہے کہ بی جے پی کی معطل ترجمان نوپور شرما کی حمایت کرنے پر منگل کو ادے پور میں دو مجرموں نے دن دہاڑے ایک درزی کا بے دردی سے قتل کر دیا تھا۔ قتل کے بعد اس نے ویڈیو جاری کی اور پیغمبر اسلامؐ کی توہین کا بدلہ لینے کے لیے قتل کی وجہ بتائی۔