رام پور:(نامہ نگار)
سیتاپور جیل میں بند قد آور لیڈر اعظم خاں کو سماج وادی پارٹی رام پور صدر سیٹ سے 2022 کا اسمبلی الیکشن لڑانے کی تیاری کررہی ہے۔ اس سیٹ سے ان کی بیوی تزئین فاطمہ ایس پی کی موجودہ ایم ایل اے ہیں۔ وہیںٹانڈہ سیٹ سے پارٹی اعظم خاں کےبیٹے عبداللہ اعظم کو ٹکٹ دے سکتی ہے۔ اتنا ہی نہیں، اعظم خاں کےقریبی ساتھی کو بھی پاس کی ایک سیٹ سے انتخاب لڑایا جائےگا۔
رام پور سماج وادی پارٹی کا گڑھ رہا ہے۔ اعظم خاں یہاں سے نو بار ایم ایل اے بن چکے ہیں۔ 2017 میںجب بی جے پی نے اتر پردیش میں مکمل اکثریت حاصل کی، اعظم خا ں نے بی جے پی کے شیو بہادر سکسینہ کو 47,000 ووٹوں سے شکست دے کر اپنی رام پور سیٹ برقرار رکھی۔ 2019 میں انہوں نے لوک سبھا کا الیکشن لڑا اور یہ الیکشن بھی جیت لیا۔ رام پور اسمبلی سیٹ خالی کرنے کے بعد انہوں نے اپنی اہلیہ کو ضمنی انتخاب لڑایا۔ انہوں نے بھی جیت حاصل کی۔
رام پور میںہے اعظم خاں کی بادشاہت
اعظم خاں پہلی بار 1980 میں اس سیٹ سے جنتا دل (سیکولر) سے ایم ایل اے بنے تھے۔ اس نشست پر ان کی بادشاہت مسلسل 1996 تک قائم رہی ۔ اس دوران انہوں نے لوک دل ، جنتا دل، جنتا پارٹی اور سماج وادی پارٹی کی نمائندگی کی۔ اترپردیش کی 13 ویں قانون ساز اسمبلی کے انتخابات میں رام پور سیٹ سے افروز علی خاں کو جیت ملی تھی۔ اس کےبعد فروری 2002 میں پھر اعظم خاں نے واپسی کی ۔ وہ مسلسل 2019 تک اس سیٹ سے ایم ایل اے بنے رہے۔ عام انتخابات میں کامیابی حاصل کرنے کے بعد انہوں نے اپنی اہلیہ کو اس سیٹ سے الیکشن لڑایا اور وہ تزئین فاطمہ ایم ایل اےبن گئیں۔
تزئین فاطمہ نے 2019 کے ضمنی انتخابات میں 79,043 ووٹ حاصل کیے تھے۔ اس کے ساتھ ہی بی جے پی کے بھارت بھوشن کے کھاتے میں 71,327 ووٹ آئے تھے۔ اس ضمنی انتخاب میں بی جے پی کو ایک بار پھر شکست کا منہ دیکھنا پڑا۔
جیل میں بند ہیں اعظم خاں
اعظم خاں یوپی میں بی جے پی کے اقتدار میں آنے کے بعد ان کے خلاف درج 100 سے زیادہ مجرمانہ معاملے میں فروری 2020 سے جیل میں بند ہیں۔ اعظم کی اہلیہ تزئین فاطمہ اور بیٹا عبداللہ اعظم کو بھی جیل میں رکھا گیا تھا کیونکہ انہیں اس کا شریک ملزم بنایا گیا تھا۔ اعظم خاں کی اہلیہ ترئین فاطمہ دسمبر 2020 میں ضمانت پر باہر آئی تھیں۔ ان کے بیٹے عبداللہ کو بھی ہفتے کے روز ضمانت پر رہا کر دیا گیا ۔
اعظم نہیں تو عبداللہ
ایس پی ذرائع کی مانیں تو پارٹی رام پور شہر سے اعظم خاں کو اور سوار ٹانڈہ سے عبداللہ کو ٹکٹ دے گی۔ اگر اعظم خاں نے الیکشن لڑنے سے انکار کیا تو پارٹی ان کی اہلیہ اور موجودہ ایم ایل اے ترئین فاطمہ سے رجوع کرے گی۔ ذرائع کا کہنا ہے کہ اعظم خاں صحت کی وجہ سے پہلے ہی الیکشن لڑنے کے خواہشمند نہیں ہیں۔ ضرورت پڑنے پر پارٹی رامپور شہر سے عبداللہاعظم کو میدان میں اتارنے کے لیے بھی تیار ہے۔
گزشتہ منگل کو ایس پی ہیڈکوارٹر میں اکھلیش یادو سے ملاقات کرنےوالے عبداللہ اعظم نے حال ہی میں جیل سےان کی رہائی کو انصاف کے لیے ان کی لڑائی میں جیت کے طور پر پیش کیا تھااور امید ظاہر کی کہ عدالت اعظم خاں کو جلد ضمانت دے دے گی۔ اعظم کی درخواست ضمانت پر اس ہفتے سماعت ہونی ہے۔ امید ہے کہ اعظم خاں اگلے چند دنوں میں اسمبلی انتخابات لڑنے کے بارے میں فیصلہ لیں گے۔